Қала әкімі тергеу шаралары жүріп жатқанын айтты.
ERNUR.KZ. Алматы әкімі Бақытжан Сағынтаев Орталық клиникалық ауруханада дәрігерлердің жаппай коронавирус жұқтыруына қатысты пікір білдірді, деп жазады Tengrinews.kz.
"Әкім ретінде және лауазымды тұлға ретінде мен қазір бұл жағдайға қандай да бір баға бере алмаймын. Тергеу шаралары жүріп жатыр. Құзыретті органдар осы мәселемен айналысып жатыр. Олар жұмысын аяқтаған соң оқиғаның мән-жайын айтады. Халық арасында көп сөз жүріп жатыр. Маған да айтып жатыр. Бірақ бұл жағдайда мен баға бере алмаймын деген пікірді ұстанамын. Комиссия бар, осы жағдаймен айналысатын мамандар бар. Комиссия шығарған қорытынды бойынша қажет шешім шығарамын", - деді Алматы әкімі онлайн конференция барысында.
Еске салайық, Орталық қалалық клиникалық ауруханада 182 дәрігер коронавирус жұқтырған еді. Аурухананың бірнеше қызметкері "Көктем" шипажайына карантинге жатқызылды.
