Жағдайы ауыр болғандықтан бала қарқынды терапия қабылдаған.
ERNUR.KZ. Бір жасар баланы алғашында үйінде энтеровирустық инфекция мен бронхиттен емдеген. Бірнеше күннен кейін ПТР тесті оның COVID-19-ға шалдыққанын көрсетті, деп жазады Stan.kz.
Петропавлда коронавирустық инфекциядан 21 бала көпсалалы балалар облыстық ауруханасында емделуде, олардың жартысы бір жастан екі жасқа дейінгі балалар, деп мәлімдеді көпсалалы балалар облыстық ауруханасы директорының емдеу жұмысы жөніндегі орынбасары Нұрлан Жақыпов.
Ол сондай-ақ, коронавирустың салдарынан бір жасар баланың қайтыс болғаны жайлы айтты.
"5 шілдеде 1 жас 2 айлық баланың температурасы көтерілді. Бұған дейін ол жергілікті дәрігердің бақылауымен үйде энтеровирустық инфекция, бронхитке қарсы ем алған", - деді Жақыпов.
12 шілдеде коронавирустың оң ПТР анализін алғаннан кейін, бала облыстық балалар ауруханасына "коронавирустық инфекция, екі жақты пневмония" диагнозымен жатқызылды. Денсаулығы нашарлағаннан кейін бала жансақтау бөліміне ауыстырылды.
"Жағдайы ауыр болатын, бала қарқынды терапия қабылдап жатты. Нұр-Сұлтанның жетекші клиникаларының дәрігерлері мен профессорларымен бірнеше рет кеңестер өткізілді. Біз шешімді дұрыс қабылдадық. Бірақ аурудың ағымы қатерлі сипатқа ие болды. Өкінішке орай, біз баланы құтқара алмадық", - деді Нұрлан Жақыпов.
Ол баланың ауруды қай жерден және кімнен жұқтырғаны туралы ешнәрсе айтпады.
Бұған дейін Денсаулық сақтау министрлігі жыл басынан бері қанша бала коронавирусты жұқтырғаны туралы мәлімет жариялаған болатын. Министрліктің айтуынша, 1 қаңтардан 16 шілдеге дейін балалар арасында COVID-19 инфекциясының 31 188 жағдайы тіркелген.
Тағы оқыңыз:
Covid-2019: Алматыда жан сақтау бөліміндегі науқастар саны үш есеге артқан
Реанимацияда жатқандардың ішінде вакцина алған науқастар жоқ – Тимур Мұратов
