​ Су тасқынынан зардап шеккен оқушылар аралық және қорытынды емтиханнан босатылды

0
831

Олардың қатарында Атырау, Ақтөбе және Солтүстік Қазақстан облыстарының білім алушылары бар.


​ Су тасқынынан зардап шеккен оқушылар аралық және қорытынды емтиханнан босатылды

Су тасқынынан зардап шеккен үш өңірде 3,5 мыңнан астам оқушы аралық және қорытынды емтихан тапсырмайды. Бұл туралы ҚР оқу-ағарту министрі Ғани Бейсембаев баяндады, деп хабарлайды ERNUR.KZ Үкіметтің баспасөз қызмеіне сілтеме жасап.

Олардың қатарында Атырау, Ақтөбе және Солтүстік Қазақстан облыстарының білім алушылары бар. Оқушылардың қорытынды бағасы жылдық бағалары негізінде шығарылады.

«Су тасқынынан зардап шеккен және ауа райының қолайсыздығына байланысты қыс мезгілінде қашықтан оқыған 2622 мектептің 832 мың оқушысы үшін 27-31 мамыр аралығында «Жазғы мектеп» жұмысы ұйымдастырылады. Жазғы мектепті ұйымдастырудың негізгі мақсаты – оқушы біліміндегі олқылықтардың орнын толтыру арқылы білім сапасын арттыруға бағытталған», - деді Оқу-ағарту министрі.

Еске сала кетсек, биыл 3,8 млн оқушы кезекті оқу жылын аяқтайды. 9 және 11-сыныптарды бітірушілер үшін қорытынды емтихандар 29 мамыр-11 маусым күндері өтеді.

Сондай-ақ, биыл алғаш рет 5-8, 10-сыныптарда қазақ тілін меңгеруді бағалау мақсатында қазақ тілінде және басқа тілде оқытатын мектептердің білім алушылары үшін аралық емтихандар өткізіледі.