Талдықорғанда алаяқ кафелер мен мейрамханаларға "айыппұл" салған

ERNUR.KZ. Талдықорған тұрғыны өзін мемлекеттік қызметші ретінде таныстырып, мейрамхана мен кафе қожайындарынан ақша бопсалаған, деп жазады Тengrinews.kz.

27 жастағы ер адам алаяқтықтың "жақсы" жолын тапқан. Ол мейрамханаларға барып, өзін мемлекеттік қызметші ретінде таныстырады. Кейін қожайынынан ақша бопсалайды. Бірақ ер адамның инспектор екенін куәландыратын құжаты болмаған. Ұсталғанға дейін ол төрт мейрамхананы алдап, жалпы 35 мың теңге алып үлгерген.

"Талдықорғанның 27 жастағы тұрғыны мемлекеттік қызметшінің атын жамылып, қаладағы ойын-сауық мекемелерін аралап, карантин режимі кезінде қорғау секілді алаяқтық қызметтерді ұсынып, сол үшін ақша талап еткен. Сұраған сомасы 5 мың теңгеден басталады. Қазіргі уақытта мұндай төрт дерек бар. Алайда тізім толуы мүмкін", - деді Алматы облысы ПД ресми өкілі Ақбота Әзірбек.