ШЫМКЕНТ: №1 қалалық клиникалық ауруханада сейсмикалық жаттығу өтті

Бұл туралы Шымкент қаласы Төтенше жағдайлар департаментінің қоғаммен байланыс тобы мәлімдеді.

Оқу-жаттығу кезінде төтенше жағдай қаупі төнген кезде медицина қызметкерлерінің әрекеттері пысықталды.

Аталған іс-шараға клиникалық аурухананың қызметкерлерінен құрылған құтқару командасы, санитарлық пост, барлау және өрт сөндіру топтары жұмылдырылды.

Айта кетейік, жалпы қалалық сейсмикалық жаттығулар қалалық азаматтық қорғау жүйесінің дайындығын және өрт, жер сілкінісі және басқа да төтенше жағдайлар туындаған кезде халықтың іс-әрекетін тексеруге бағытталған.

Оқу-жаттығудың барысында №1 қалалық клиникалық ауруханада қызметкерлерімен жеңіл дәрежедегі науқастарды қауіпсіз аймаққа шығару, тасымалдауға келмейтін науқастарды болуы мүмкін жер сілкінісі кезінде, терезелерден, ауыр жиһаздардан және тағы басқа да қауіпті нысан маңынан алысқа жайғастыру, алдын ала дайындалған ғимарат ішіндегі қауіпсіз орындарға жайғастыру пысықталды.

Жалпы мұндай жаттығулар жыл сайын "Азаматтық қорғау туралы" Қазақстан Республикасының Заңына сәйкес өткізіледі. Сейсмикалық жаттығуларға барлық азаматтық қорғау және төтенше жағдайлар қызметтері, ұйымдар, кәсіпорындар, медициналық мекемелер, оқу орындары және қала тұрғындары жұмылдырылды.

Еске сала кетейік, Шымкент қаласы әкімінің қаулысына сәйкес, 2023 жылдың 5 мамырында өтетін жалпықалалық сейсмикалық оқу-жаттығу ауа райының қолайсыздығына байланысты 12 мамырға ауыстырылды.

12 мамыр күні сиреналардың дыбысын естігенде ғимараттан шығып, ашық, қауіпсіз жерге бару қажет.

Үйден шықпас бұрын газды, суды, электр қуатын өшіруді ұмытпаңыздар. Үрейге берілмей, сабыр сақтауды сұраймыз.