ШЫМКЕНТ: Е.Айтаханов қалалық аурухана мен перзентханаға күрделі жөндеу жұмыстарын жүргізуді тапсырды

Бүгін Шымкент қаласының әкімі Ерлан Айтаханов «Нұрсәт» шағынауданындағы қалалық перинаталдық орталық пен көпсалалы № 2 қалалық ауруханасының және қалалық перзентхананың жұмысымен танысты, деп хабарлайды ERNUR.KZ.

Шымкент қаласындағы медицина нысандарын аралап көрген қала басшысы өзекті мәселелер бойынша жауапты сала жетекшілеріне тапсырмалар жүктеп, №2 қалалық аурухана мен қалалық перзентханаға күрделі жөндеу жұмыстарын жүргізуді және жөндеу жұмыстарын ең алдымен перзентхана бөлімінен бастау қажеттігін нықтап айтты.

Медицина мамандарына емделушілерге сауатты қызмет көрсетуді, ана мен бала денсаулығына айрықша көңіл аударып, жіті бақылауда ұстауды міндеттеді. Сонымен қатар, денсаулық саласына еңбегі сіңген, өмірлік тәжірибесі мол, білікті ардагер дәрігерлермен кеңесіп отыру үшін ардагер дәрігерлердің кеңесін құруды тапсырды.

Сондай-ақ, аталған ауруханалардың жұмысымен танысу барысында әкім медициналық жабдықтардың қолжетімділігі мен жағдайына, пациенттердің денсаулығына, оларды емдеу шарттары мен қажетті дәрі-дәрмектердің болуына назар аударып, ем қабылдаушылардың жағдайын сұрады.