ТҮРКІСТАН: Арыста Айбол Сабырханұлын еске алуға арналған спартакиада өтті

Арыста Айбол Сабырханұлын еске алуға арналған БАҚ өкілдері арасында спартакиада өтті, деп хабарлайды ERNUR.KZ.

Арыс қаласында Әлібек Айбол Сабырханұлын еске алуға арналған бұқаралық ақпарат құралдары қызметкерлері арасында облыстық спартакиада өтті. Жарысқа Түркістан облысы мен Шымкент қаласынан келген командалар өз бақтарын сынады.

Жарыстың ашылу салтанатында қала әкімі Гүлжан Құрманбекова сөз сөйлеп, ақпарат майталмандарын төл мерекесімен құттықтады. Мемлекеттік қызметте жүріп, Арыс қаласының өркендеуіне өзіндік таңба қалдырған Айбол Сабырханұлы жайлы естелігімен бөлісіп, қатысушыларға сәттілік тіледі.

«Айбол Сабырханұлы қалалық ішкі саясат бөлімін басқара жүріп, өзі туған өңірдің дамуы үшін бар күш-қайратын жұмсады. Қызметін жергілікті газетте бастаған ол мемлекеттік қызметте жемісті жұмыс атқарды. Білікті басшы қарапайымдылығымен, іскерлігімен, жоғары адамгершілік қабілеттерімен ел есінде мәңгіге сақталады. Мен осы сәтті пайдаланып, ел азаматын ардақтауға келіп отқан әріптестеріне, дос-жарандарына шынайы алғысымды айтамын» - деді қала басшысы.

Сондай-ақ, Айбол Сабырханұлымен қызметтес болған ел ағалары мен ақпарат саласының ардагерлері, достары мен туыстары жүрек жарды лебіздерімен бөлісті.

Арыс қалалық ішкі саясат бөлімінің ұйымдастыруымен өткен жарыста 60-тан астам БАҚ саласының майталмандары спорттың тоғыз түрі бойынша сайысты. Атап айтқанда, журналисттер шағын футбол, дойбы, асық ату, үстел теннисі, арқан тарту, ләңгі, қол күресі, кір тасын көтеру және шахматтан кіл мықтыдан кіл мықтыны анықтады.

Жарыс қорытындысында «Түркістан» телеарнасының командасы жеңімпаз деп табылып, I орын биігінен көрінсе, «Тұран-БАҚ» газетінің құрамасы II орын, Ақпараттық Талдау орталығының мамандары III орынды жеңіп алды.

Барлық жеңімпаздарға қаржылай сертификаттар мен арнайы сыйлықтар табысталды. Сондай-ақ, жарыста әр спорт түрінен ерекшеленген жекелеген қаламгерлер де арнайы алғыс хаттармен марапатталды.

Жиын соңында Айбол Сабырханұлының дос-жарандары келген жұртшылыққа ас берді.

Айта кетейік, Айбол Сабырханұлы ата-анаға қайырымды ұл, ағайынға жанашыр жан, мейірімді әке, арқа сүйер азамат, Арыс қаласының ішкі саясат бөлімін бірнеше жыл басқарған өз ісінің білікті маманы, мемлекеттік қызметте талай жыл тәжірибелі еңбек етті.

Ол 2019 жылы Арыс қаласында орын алған төтенше жағдай кезінде, отбасынан жырақта жүріп. Халықтың қауіпсіздігін қамтамасыз ету мақсатында жан аямай еңбек етіп, қызметін қалтқысыз атқару арқылы туған жер үшін тер төгудің қайталанбас үлгісін көрсете білді. 2020 жылғы пандемияда, 2021 қуаңшылық болған жылдары да батыстық ағайынға көмек ұсынып, Арыстың азаматтары артқан малға жем-шөпті жеткізуде бас қасында болды.