Ақмола облысында жетінші баласына жүкті әйел қайтыс болды

ERNUR.KZ. Ақмола облысы Бестөбе ауылында 34 жастағы жетінші баласына жүкті әйел 34-аптада қайтыс болды, деп жазады azattyq-ruhy.kz.

Марқұм алты баланың анасы болған. Туыстарының айтуынша, ол шаршағанын айтып, демалуға жатқан, бірақ содан кейін оянбаған. Қайғылы оқиға болған кезде үйде балалары, жұбайы және ата-анасы болған. Жедел жәрдем шақырылғанымен, дәрігерлер әйелге көмек көрсетуге үлгермеген — ол жедел жәрдем келгенге дейін көз жұмған. Денесінде зорлық-зомбылық белгілері табылмаған.

Облыстық денсаулық сақтау басқармасы өкілдерінің алдын ала мәліметі бойынша, әйелдің өліміне «жедел жүрек-қан тамыр жеткіліксіздігі» себеп болған.

«Алдын ала себеп — жедел жүрек-қан тамыр жеткіліксіздігі. Сот-медициналық сараптама тағайындалды. Туыстарына көңіл айтамыз», — делінген баспасөз қызметінің хабарламасында.

Сонымен қатар Ақмола облысы полиция департаменті де бұл оқиғаға қатысты түсініктеме берді. Олардың мәліметінше, әйелдің өліміне байланысты сотқа дейінгі тергеу басталған. Тергеу аясында қажетті сараптамалар мен тергеу шаралары жүргізіліп жатыр.