ДСМ: Баланың денсаулық паспорты электрондық форматқа ауыстырылады

0
332

EGov Mobile-мен электрондық паспортты интеграциялау процесін 2024 жылғы тамызда аяқтау жоспарланған.


ДСМ: Баланың денсаулық паспорты электрондық форматқа ауыстырылады

ҚР Денсаулық сақтау министрлігі медициналық қызметтерді цифрландыру бойынша жұмыс шеңберінде баланың денсаулық паспортын электрондық форматқа көшіру жобасын әзірледі. Ата-аналар бұл құжатты бірінші сыныпқа түскен кезде міндетті түрде мектепке ұсынады, балалар саны жыл сайын 380 мыңнан асады, деп хабарлайды ERNUR.KZ ведомствоның баспасөз қызметіне сілтеме жасап.

Баланың денсаулық паспорты – денсаулықты нығайтуға, аурулардың алдын алуға және кішкентай пациенттерді емдеуге бағытталған профилактикалық іс-шаралар туралы ақпаратты қамтитын негізгі құжат.

Бұл құжатты қағаз жүзінде жүргізу көбінесе оның жоғалуына немесе өзекті деректерді жоғалтып алуға, емханаларда ұзақ күтуге әкелді. Осы проблемаларға жауап ретінде Денсаулық сақтау министрлігі Оқу-ағарту министрлігімен бірлесіп, баланың денсаулық паспортын электрондық форматқа ауыстыруға кірісті.

Денсаулық сақтау министрлігінің ақпараттық жүйелерін тестілеу кезінде баланың 72 электрондық денсаулық паспорты (052-2/е нысаны) қалыптастырылды. EGov Mobile-мен электрондық паспортты интеграциялау процесін 2024 жылғы тамызда аяқтау жоспарланған.

Электрондық паспортты енгізу ата-аналар үшін қағазбастылықты азайтады, сондай-ақ eGov Mobile және eDensaulyq электрондық қызметтері арқылы балалардың денсаулығы туралы ақпаратты алуды ыңғайлы етеді. Білім беру мекемелері оқушылардың денсаулық жағдайы туралы өзекті деректерді жедел ала алады, олар емханаларда медициналық қарап-тексеруден кейін автоматты түрде беріледі.