40 жастағы күдікті ұсталды.
иллюстрациялық фото
ERNUR.KZ. Қарағанды облысының 40 жастағы тұрғыны кәмелетке толмаған ауыл тұрғынын зорлады деген күдікке ілінді. Аймақтағы Полиция департаментінің мәліметінше зардап шеккен қыз жүкті болып қалған, - деп жазады Tengrinews.kz.
Кәмелетке толмаған жәбірленушіні аздыру туралы ақпарат полицияға 31 желтоқсанда блогер Айсұлтан Жақыповтан түскен. Ол оқиғаның қай ауылда болғанын, ата-аналар бұл фактіні жасыратынын айтқан.
"Сол күні түскен хабарламадан кейін ҚР ҚК-нің 120-бабы 4-бөлігіне сәйкес "Зорлау" бойынша қылмыстық іс тіркелді. Облыстағы Полиция департаментінің тәжірибелі қызметкерлерінен жедел-тергеу тобы құрылды. Олар қысқа мерзімде елді мекенді және оқиғаға қатысы бар адамдарды анықтады", - деді ведомстводағылар.
Сондай-ақ, баспасөз қызметінің мәліметінше, алдын ала тергеу барысында фактілер расталған. Полиция қызметкерлері облыстың 40 жастағы тұрғынын ұстаған.
"Сот оған қатысты "қамауға алу" бұлтартпау шарасын тағайындады. ҚР ҚПК-нің 201-бабына сәйкес басқа ақпарат жарияланбайды", - деп толықтырды Қарағанды облысы Полиция департаментінің баспасөз қызметіндегілер.
