​Головкин үшін көлігінің нөмірін ауыстырған шымкенттік елді таң қалдырды (видео)

ERNUR.KZ. Қашан да елді таң қалдырудан шаршамайтын шымкенттіктер тағы да көпшіліктің аузына ілікті. Бұл жолы Шымкент азаматы Головкинге деген ерекше құрметін көрсетіп, көпшіліктің танданысын тудырды. Ол ақ түсті «Toyota» маркалы қымбат көлігінің мемлекеттік нөмірін боксшының құрметіне орай нөмірді жаңасымен алмастырған. Оны әлдекім видеоға түсіріп, желіге таратып жіберді. Онда ер кісінің онсыз да қымбат тұратын мемлекеттік нөмірін 999GGG/13 мемлекеттік нөміріне алмастырып жатқанын көруге болады.

Видеоны түсіріп тұрған азамат көлік иесіне «Ағатай, неге нөміріңді ауыстырып жатырсың?" деп сұрақ қояды. Көлік иесі болса, «Гена, туысым. Барлығы сен үшін, міне, ауыстырып жатырмыз» деген жауап қатады. Қазақстан атын әлемге танытып жүрген кәсіпқой боксшы Геннадий Головкин үшін мұндай әрекетке барған азамат ескі нөмірді лақтырып тастайтынын жеткізеді. Спортшы үшін осындай «құрбандыққа» барған ер кісінің бұнысына тәнті болған желідегілер оны нағыз жанкүйерге балап, тіпті шымкенттік жігіттерге мақтауларын жаудырды. Дегенмен ер азаматтың бұл әрекетіне күмәнданғандар да жоқ емес. Солардың бірі «Жаңа нөмірді алу үшін ескі нөмірді өткізу керек сияқты еді. Не болса да, Гена алға!» деген пікір қалдырды.

Айта кетерлігі, желі қолданушыларының кейбірі Головкиннің құрметіне деп алмастырылған мемлекеттік нөмірмен Шымкентте өзге көлік иесінің темір тұлпарын тізгіндеп жүргенін алға тартып, бұл оқиғаға түсінбестік танытты. «Бұл нөмірді ақ "Приора" тағып жүр ғой, жаңа ғана көрдім», «Иә, бір егде жастағы кісі тағып жүр, мен де көрдім» деп жазды желідегілер.

Видео: желіден алынды