ШҚО-ға Түркістан облысынан мыңнан астам маман шақырылды

ERNUR.KZ. Облысаралық бос орындар жәрмеңкесінде Шығыс Қазақстанның жұмыспен қамту басқармасы түркістандықтарды жұмысқа шақырды, деп жазады Алтайньюс.

Жәрмеңкеде Шығыста 1366 бос жұмыс орыны бары айтылды. Оның ішінде денсаулық сақтау саласына – 181, білім беру саласына – 343, ал ауыл шаруашылығына 77 маман керек.

Аймағымызға оңтүстік өңірлерден келіп қоныстанғандар жұмыспен қамтамасыз етіліп жатыр. Кейбірі жер алып, жеке шаруашылықпен де айналысуда. Сіздер де келіңіздер, жағдай жасалады, – деді облыстық жұмыспен қамту басқармасының басшысы Ерболат Ошақбаев.

Аталмыш басқарманың мәліметіне сүйенсек, қалаға келуді қалайтын отбасының әр мүшесіне 50 500 теңге, ал ауылға келуді қалайтын отбасының әр мүшесіне 37 875 теңгеден қаражат беріледі екен.

Сондай-ақ оларға субсидиямен үй алуға да болады.

Келемін деушілерге отын да, мал да беріледі, – деді басқарманың баспасөз қызметкері.

Айта кетейік, жәрмеңкеге Түркістан облысының 2 000-дай тұрғыны қатысты.