"Қаңтар оқиғасы": Шымкентте жаппай тәртіпсіздік ұйымдастырғандарға қатысты сот үкімі шықты

Шымкентте жаппай тәртіпсіздік ұйымдастырғандарға қатысты сот үкімі шықты, деп хабарлайды ERNUR.KZ.

2022 жылғы қаңтар айының 5-нен 6-на қараған түні Шымкент қаласы әкімшілік ғимаратының алдында жаппай тәртіпсіздік орын алған. Назарбаев даңғылының бойында “Рупор” дыбыс үлкейткіш құралын пайдалану арқылы ұйымдастырушылар адамдарды шақырып, саяси дүрбелең туғызды.

Аталмыш тәртіпсіздікті ұйымдастырушыларға Шымкент қаласы Полиция департаментінің тәртіп сақшыларымен жедел-іздестіру іс-шаралары ұйымдастырылды. Қаладағы көшелер мен ғимараттардағы барлық бейнекамералар қаралып, полиция қызметкерлерінің шұғыл әрекет етуінің, тәулік бойы іздеу жұмыстарын жүргізуінің нәтижесінде, күдіктілер қолға түсті.

Оларға қатысты тергеп-тексеру амалдары жүргізілді. Тексеру барысында олардың бір-бірімен Полиция басқармаларының ғимараттарын өртеу, басып алу, жаппай тәртіпсіздікке қатысушыларды шабыттандыру, адамдарды қаруландыру, қаржыландыру, арнайы техникалардың жүруіне кедергі жасау үшін жүк көліктерімен ірі және майда тастарды төгу туралы ұялы байланыс арқылы сөйлескендіктері анықталды.

Сондай-ақ, олардың 2021 жылы ҚР ҚК-нің 405-бабында (Қоғамдық немесе дiни бiрлестiктiң не өзге де ұйымның экстремизмдi немесе терроризмді жүзеге асыруына байланысты олардың қызметiне соттың тыйым салу немесе тарату туралы шешiмiнен кейiн олардың қызметiн ұйымдастыру және оған қатысу) қарастырылған қылмыстарды жасағаны, пробациялық бақылаудың есебінде тұрғаны, алдын жасаған қылмыстарынан нәтиже шығармағандары белгілі болды.

Күдіктілерге қатысты Шымкент қаласы Әл-Фараби аудандық соты биылғы жылғы 15 шілденің үкімімен ҚР ҚК-нің 272-бабының 2,3-бөліктерімен кінәлі деп танып, 3 адамға бас бостандығынан айыру жазасы тағайындалды.