Арыс қаласында «Мемлекеттік тіл – Мәңгілік Елдің тілі» атты фестиваль өтті

19.09.2018 08:51

1 928

Елбасымыз Н.Ә.Назарбаев: «Қазақстанды мекендейтін әр түрлі ұлт өкілдерінің тіліне құрмет көрсету, олардың ана тілінде білім алып, төл мәдениетін дамытуына жағдай жасау мемлекетіміздің маңызды стратегиялық міндеттердің бірі»-деп айтқан болатын.

Бүгін Арыс қалалық мәдениет үйінде «Қазақстан халқының тілдері күні» мерекесіне орай «Мемлекеттік тіл-мәңгілік елдің мәңгілік тілі» атты қалалық фестиваль өтті, деп хабарлайды ERNUR.KZ қала әкімдігінің баспасөз қызметіне сілтеме жасап.

Фестивальдің мақсаты Қазақстан халқының туған еліне, туған тіліне деген сүйіспеншілігін арттыру, балабақша мен мектеп ұйымдары табалдырығынан бастап, ана тілінің қайнар бұлағы, алғашқы сатысы - қазақ тілінің мәртебесін көтеру, өзге ұлт өкілдерінің мемлекеттік тілде таза сөйлеуін дамыту, тілге деген құрметін арттыру.

Мерекелік шарада сөз алған қала әкімінің орынбасары Р.Айтбаев: «Қазақстан бүгінде сан ұлттың достық мекеніне айналды. Республикамыз бойынша 130-дан аса ұлт өкілдері Қазақстанды Отаным деп өмір сүріп жатқандығын ескерсек, облысымызда 108, қаламызда 20-дан аса ұлттың ынтымағы жарасқандығын күнделікті тұрмыста көріп жүрміз. Бірнеше ұлтты бауырына басқан, ұлы достық пен мәдениеттің алтын бесігі Тәуелсіз Қазақстанымыздың болашағы жарқын болсын», - деді.

Салтанатты мереке соңында тілдерді қолдану мен дамытуда өз үлесін қосып жүрген бірқатар азаматтар қала әкімінің Алғыс хатымен марапатталып, мәдениет үйінің өнерпаздары дайындаған мерекелік концерттік бағдарламаға ұласты.