Түркістан облысы Түлкібас ауданында жол ортасында тоқтап тұрған автобус жолаушылары құтқарылды, деп хабарлайды ERNUR.KZ.
Бұл туралы ҚР ІІМ Төтенше жағдайлар комитетінің ресми өкілі Нұрсұлтан Нұрахметов: «18 қаңтар күні сағат 02:55-те жедел кезекшілердің басқару пультіне Түлкібас ауданы Келтемашат ауылы тұсында «Алматы-Ташкент-Термез» жолында жолаушылар автобусының тоқтап қалғаны туралы ақпарат түсті. Шымкент-Астана бағытына бет алған «Neoplan» маркалы автобусы техникалық ақаудан жол ортасында қалған, көлікте 47 жолаушы болған», - деп хабарлады.
Облыстық ТЖ департаментінің қызметкерлері 12 жолаушыны (1 Өзбекстан азаматы, екеуі - бала) Келтемашат ауылына эвакуациялаған. Ешқайсысы медициналық көмекті қажет етпеген, ал қалған 35 жолаушы автобуста қалуды ұйғарыпты. Келесі автобус жеткенше оларды Өрт сөндіру қызметінің «Урал-Вахта» машинасына жайғастырған.
дереккөз:ҚазАқпарат
