Ақтөбе облысында шахтерлар жалақыны көтеруді талап етті

ERNUR.KZ. 12 мамыр күні Ақтөбе облысының Хромтау қаласында 70-ке жуық шахтер шахтаға түсуден бас тартты, деп жазады Stan.kz.

Дон тау-кен байыту комбинатының "Қазақстан Тәуелсіздігінің онжылдығы" шахтасында жұмыс істейтіндер жалақыны көтеруді талап етті.

“Өткізгіш болып жұмыс істеймін. Жұмыс өте қиын. Жалақымызды өсірсін! Бұдан басқа ештеңе айта алмаймыз”, — деді қызметкерлердің бірі.

Шахтерлердің ереуілі туралы ақпаратты "Қазхром" трансұлттық компаниясы мен Ақтөбе облысының әкімдігі растады, онда кәсіпорынға еңбек инспекциясы басқармасының өкілдері кіретін жұмыс тобы жіберілгені айтылды.

"Жұмыс тобы компания басшылығымен кеңес өткізді. Кәсіпорын өкілдері жұмысшылармен келіссөздер жүргізді, тараптар бірыңғай шешімге келді. Өндірістік үдеріс бұзылған жоқ, өткізгіштер өз міндеттеріне кірісті", – делінген әкімдік хабарламасында.

"Қазхромның" ақпараты бойынша, Eurasian Resources Group-қа жататын барлық кәсіпорындарда қаңтарда жалақы 15%-ға көтерілді.

“Жұмысшылардың жаңа талаптары "ескеріледі", – деп мәлімдеді" Қазхром".

Бірақ қай айдан бастап жұмысшылардың жалақысын көтеру жоспарланғанын нақтылаған жоқ.

"Қазхром" – трансұлттық тау-кен металлургиялық компаниясы. Онда 19 мың адам жұмыс істейді.