Ақтөбеде көпқабатты үйден құлап қайтыс болған әйелдерге қатысты жаңа дерек айтылды

ERNUR.KZ. Марқұмдар бір-біріне туыс па, таныс па - полицейлер ашып айтпады. Белгілісі, 25-қабатты үйден құлаған сәтте олар подъезд алдында тұрған "Лексус" автокөлігінің үстіне түскен, деп жазады inbusiness.kz.

Бүлінген көліктің үстін матамен жауып, дене құлаған жерге топырақ сеуіп тастаған. Қазір "Өзін-өзі өлтіруге дейін жеткізу" бабы бойынша сотқа дейінгі тергеу жүріп жатыр.

Мұндай қайғылы жайт "Ақтөбе ажары" тұрғын үй кешенінде бұрын да болған. Бірнеше мәрте жастар құлап, қайтыс болған еді. Тұрғындар бұл үйдегі көп пәтерді қожайындары жалға беріп қойғанын айтты.

Бір тәулік бұрын Ақтөбеде тағы бір қайғылы жағдай тіркеліпті. 1996 жылы туған бойжеткен 8-қабаттан секіріп, көз жұмған. Полицейлер бұл екі жағдайдың бір-біріне қатысы жоқ екенін айтты. Қазір жай-жапсарын анықтап жатыр.

Еске сала кетсек, бұған дейін Ақтөбедегі көпқабатты үйлердің бірінде екі әйелдің жоғарғы қабаттан секіріп көз жұмғанын жазған болатынбыз.