Әлеуметтік маңызы бар азық-түлік тауарларының бағасын тежеу мәселелері бойынша кеңес өтті

21 қаңтар, сенбі күні Сауда және интеграция бірінші вице-министрі Арман Шакқалиев әлеуметтік маңызы бар азық-түлік тауарларының (ӘМАТ) бағасын тежеу мәселелері бойынша кеңес өткізді, деп хабарлайды ERNUR.KZ.

Сауда комитетінің мәліметі бойынша, өткен аптада негізінен көкөністерге бағаның өсуі байқалды. Атап айтқанда, пияз бағасы 5,5% -ға, сәбіз 1,3%-ға, картоп 1%-ға қымбаттады.

ҚР Ауыл шаруашылығы вице-министрі Бағлан Бекбауов өңірлік тұрақтандыру қорлары мен ағымдағы қорлардың резервтерін қалыптастыру бойынша жүргізіліп жатқан жұмыстардың нәтижелерін ұсынды. Халықтың көкөністерге деген қажеттілігін қамтамасыз ету үшін 20,4 мың тонна пияз, 23,5 мың тонна сәбіз, 17,1 мың тонна қырыққабат сатып алынды. Әкімдіктердің деректеріне сәйкес, өңірлерде осы кезеңге шамамен 78,5 мың тонна картоп, оның ішінде форвардтық шарттар шеңберінде – 36 мың тонна, "айналым схемалары" бойынша – 42,5 мың тонна келісімшарт жасалды. 2023 жылдың мамыр-маусым айларында ішкі нарықтың қажеттілігі Түркістан облысының ерте картопына келісімшарт жасау және оңтүстік елдерден импорттық жеткізілімдер есебінен қамтамасыз етілетін болады.

"ҚР АШМ ерте көкөністерді сатып алуды қамтамасыз ету үшін Түркістан облысының ауыл шаруашылығы басқармасымен бірлесіп көшпелі кеңес ұйымдастырды, онда барлық өңірлердің өкілдері қатысты, қорытындысы бойынша өңірлік ӘКК қазақстандық ерте көкөніс өндірушілермен ниет шарттарын жасасты", - деп хабарлады ҚР Ауыл шаруашылығы вице-министрі.

Осылайша, 2022 жылғы егіннен қалыптасқан резервтер "сатып алу бағасы + сақтау шығындары" баға ауқымында 2023 жылдың сәуір айының соңына дейін өңірлердің қажеттіліктерін қамтамасыз етуге мүмкіндік береді. Бұл маусымаралық кезеңде бағаның күрт ауытқуын болдырмауға мүмкіндік береді, ал мамырдан маусымға дейін бөлшек саудада жаңа өнім өткен жылдың сәйкес кезеңіне қарағанда төмен бағамен қол жетімді болады. Тәжікстанмен маусымаралық кезеңде 6 мың тонна ерте пиязды кепілдендірілген жеткізу туралы келісімге қол қойылды. Осыған ұқсас келісімшарттар Пәкістанмен және Өзбекстанмен пысықталуда.

"Өткен аптада алдағы маусымға арналған көкөністердің индикативті бағаларын қалыптастыру үшін біз барлық өңірлерге келесі факторларды ескеретін есептеулер жібердік: 2022 жылғы 27 желтоқсандағы жағдай бойынша көкөністердің бағасы бойынша Ұлттық статистика бюросының деректері, сатып алу, сақтау бағасы, көлік шығындары және сауда үстемесі ескерілген. Бұл 2022 жылғы егіннің индикативті бағасын есептеу формуласы. "Нарықтық баға+сауда үстемесі" формуласы биылғы егінге қолданылмауы керек. Тек осылай ғана біз болжам жасай аламыз және инфляцияның қолайлы дәлізін қалыптастыра аламыз. Енді өңірлерге қысқа мерзімде, келесі аптаның ортасына дейін көкөністердің индикативті бағасын қалыптастыру қажет. АШМ-нің әлеуметтік маңызы бар азық-түлік тауарларына бағаларды тұрақтандыру тетіктерін іске асырудың үлгілік қағидаларында барлығы баға мониторингі мен индикативтік деректер негізінде тұрақтандыру қорлары қандай жағдайларда жұмыс істейтіні және интервенциялар жүргізілетіні нақты жазылған. Бірақ сіздерде индикативтер болмаса, қалай жұмыс істейсіздер?, - деп Арман Шакқалиев түйіндеді.

Кеңес қорытындысы бойынша сауда және интеграция бірінші вице-министрі барлық өңірлерге Түркістан облысының әкімдігімен бірлесіп 5 күн мерзімде ерте көкөніс өндірушілермен форвардтық шарттар жасасу бойынша жұмыс жүргізуді тапсырды.