Алматыда студент қыз жігітті тепкілеп, ақша талап етті – желіде видео тарады

Видеода жас қыз ер адамнан ақша талап етіп, ұрып жүр. Соңында жерге құлатып, тепкілейді.

Алматы қалалық полиция департаменті бұл оқиғаның Наурызбай ауданында болғанын хабарлады. Ер адамды ұрған 2005 жылы туған қыз анықталды. Оны ювеналдық полицияның есебіне қойды. Оқиғаның мән-жайы анықталып жатыр.

Қазіргі кезде Қылмыстық кодекстің 293-бабы ("Бұзақылық") бойынша қылмыстық іс қозғалды.

Бұдан бөлек, қыздың анасына қатысты Әкімшілік құқықбұзушылық кодекснің 127-бабы ("Кәмелетке толмаған адамды тәрбиелеу жөніндегі міндеттерді орындамау") бойынша хаттама рәсімделді.

"Материалдар кәмелетке толмағандардың істері және олардың құқықтарын қорғау жөніндегі ведомствоаралық комиссияның қарауына жіберілді", - дейді полицейлер.

Айта кетері, бұзақылық үшін 2000 АЕК-ке дейiнгi айыппұл не сол мөлшерде түзеу жүмыстары немесе 600 сағатқа дейінгі мерзімге қоғамдық жұмыстарға тарту қарастырылған. Екі жылға дейінгі мерзімге бас бостандығын шектеу не сол мерзімге бас бостандығынан айыру жазасы да қолданылуы мүмкін.

Ал оны дұрыс тәрбиелеу алмағаны үшін анасына 10 АЕК (34 500 теңге) көлемінде айыппұл салынады.