Білім күнінде 1-сынып оқушыларына Әліппе салтанатты түрде табысталады – Аймағамбетов

"Биылғы 1 қыркүйекте жылдағыдай салтанатты іс-шара өтеді. Осы салтанатты шарада алғаш мектеп табалдырығын аттап жатқан 1-сынып оқушыларына Әліппені ұстатуымыз керек. Бұл - өте жақсы дәстүр. Әліппе - баланың ең алғашқы оқулығы. Сондықтан былтыр айтқандай, Әліппені дайындадық. Жалпы Әліппе дайын. Өңірлерге жеткізіліп жатыр", - деді министр.

Асхат Аймағамбетов Әліппе пен «Букварь» дайындалып, Ана тілі бойынша да дайындық жүргізілгенін айтты.

"Салтанатты іс-шарада балалардың қолына Әліппені табыстауымыз керек. Сондықтан бұл жұмысты алдын ала ұйымдастыру қажет. Әліппе бойынша әдіскерлер мен ғалымдар ауқымды жұмыс атқарды. Ұлт ұстазы Ахмет Байтұрсыновтың 1912 жылғы Әліппесіндегі басты қағидат негізінде оқулықты әзірледік. Бұл әдістеме бойынша көп рет мәселе көтерілді. Оның негізгі ұстанымындағы дыбыспен жаттығу, әрбір дыбыстың сөз жасаудағы қызметін еске алу, буын бойынша оқу, оңайдан қиынға, жеңілден күрделіге өту қағидасын сақтадық", - деді ол.

Министр атағандай, Әліппеде барлық оқу мақсаты сақталды.

"Сондықтан әдістемелік жағынан баланың жас ерекшелігіне сәйкес жұмыстар жүргізіліп жатыр. Әліппені I-II тоқсанда балалар оқып, III тоқсаннан бастап Ана тілін оқиды. Осы жұмысты барлық өңірлер тиісті деңгейде жүзеге асырады деп ойлаймын", - деді ол.