Қапшағайдағы ерекше зауыт еліміздегі балық шаруашылығын жаңа сатыға көтереді

ERNUR.KZ. Бизнесмен Александр Щетинин Қапшағай су қоймасының солтүстік жағалауында Қазақстанда бірінші болып KazOrganicProduct ЖШС балық өсірудің толық кезеңін қамтитын органикалық балық өнеркәсібі кешенін іске қосты, деп жазады Aikyn.kz.

Бизнесмен Александр Щетининнің командасы балық өсіру ісін бекерден-бекер таңдаған жоқ. Ол Үш жыл бойы әлемдегі бірқатар балық зауыттарының тәжірибесін зерделеп, ең тиімді деген тәсілдер мен балық түрлерін таңдап алған.

Балық шаруашылығы тура­лы жаңалыққа құлақ түріп жүре­тіндер түгел жиналған зауыт­тың ашылу салтанатына Қапшағай қаласының әкімі Талғат Қайнарбеков, «Атаме­кен» ҰКП өкілдері, Ресей, Қытай және Израиль елдері­нен арнайы келген серіктес ком­паниялардың жауапты тұл­ғалары мен журналистер қатысты.

Жаңа кәсіпорынның бұ­рын­­­ғылардан басты ерек­ше­лігі – еліміздегі өзіндік балық өсіру материалдары және жем­дік қорымен жұмыс істей­тін, экологияға ешқандай нұқсан келтірмейтін, алғашқы «тұйық» өндіріс екенінде. KazOrganicProduct ЖШС жобасы йод тапшылығы бар аймақта аса маңызды болып саналатын балық өнімдерімен тұрғындарды қолжетімді баға­да қамтамасыз ету арқылы тірлік сапасын арттыру тұрғы­сында Қазақстанның азық-түліктік қауіпсіздігі бағдарла­ма­­сына толықтай жауап бере­ді. Балық шаруашылы­ғын­да өзіндік аналық топ бар және солардан алынған мате­риал­дар балық өсіруге пайда­ла­ны­ла­ды. Азықтық базасы да жаб­дықталған. Барлық өнім­дер бірқатар тазалау сатылары­нан өткен, тұйық сумен қам­та­масыз ету құрылғысы арқы­лы келетін су толтырылған жасанды хауыздарда өсіріледі.

– Клариус, баррамунди, страй­басс, тилапия, нефриттік алабұға, австралиялық қызыл-қысқашты шаян – кіші лобс­тер сынды африкалық және австралиялық балық түрлерін өсіреміз. Алғашқы өнімдерді алдағы күзде сауда сөрелеріне шағарамыз деген жоспар бар. Бастапқы кезде жылына екі тонна шығарып, сонан соң сұра­нысқа қарай оның көле­мін он тоннаға жеткізбек­піз. Бұл жоспар қазақстандық­тар­дың бұған дейін өздеріне таң­сық болып келген өнімдерді қабылдауына байланысты екені айтпаса да түсінікті. Жерлестеріміз бұрын естіме­ген балық түрлерін жақсы көріп кетеді деген үміт үлкен. Өйткені біз әлемде үлкен сұра­нысқа ие балық түрлерін таңдадық. Сонымен бірге, бағасы да халыққа қолжетімді болады, – дейді зауыттың бас директоры Александр Щети­нин.

Ол сонымен бірге, кәсіпо­­рында әлемдік тәжірибе негіз­ге алынғанымен, балық өсіру­дің өзіндік қазақстандық технологиясы қолданылаты­нын да атап өтті. Қажеттілік туындап жатса, өндірістік қуат­тылықты барынша артты­рып, еліміздің аумағын да қам­туға мүмкіндіктері бар кө­рінеді. Жаңа өндіріске маман ихтиологтар аса қажет. Әзірге шетелдік мамандардың кеңесіне арқа сүйеп отырған кәсіпорын болашақтың қа­мын бүгіннен ойлап, қажет­ті мамандарды оқытып алуға тырысуда. Қазіргі кезде зауыт­та жиырма адам жұмыс істейді. Балықты мұздату мен қайта өңдеу жұмыстары жолға қойыл­ғанда жұмысшылар саны еселеп артпақ.