Каспий теңізінде есірткі тиеген шетелдік кеме ұсталды – видео

"2021 жылғы қазанда шекара қызметі мен ҰҚК Маңғыстау облысы бойынша департаменті Каспий теңізі су айлағындағы бірлескен іс-шаралар барысында Қазақстан Республикасының мемлекеттік шекарасын қасақана заңсыз кесіп өткені үшін екі шетел азаматы бар "Амур" типті шағын кемені ұстады", - делінген ресми хабарламада.

Жүзу құралын тексеру барысында салмағы 14 келі "апиын", 8 келі "гашиш" және "метадон" психотроптық затының 29 пластинасы тәркіленді.

2021 жылғы желтоқсанда ұсталғандардың біреуі Қылмыстық кодекстің 392-бабы, 1-бөлігі (Қазақстан Республикасының мемлекеттік шекарасын қасақана заңсыз кесіп өту) бойынша кінәлі деп танылып, 5 жыл мерзімге Қазақстан аумағынан шығарумен 6 айға бас бостандығынан айырылды.

Ал екіншісі Қылмыстық кодекстің 286-бабы 4-бөлігі (айналыстан алып қойылған заттардың немесе айналысы шектелген заттардың контрабандасы), 297-бабы 3-бөлігі 1, 3-тармақтары (есірткі құралдарын, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу) және 392-бабы 1-бөлігі (Қазақстан Республикасының мемлекеттік шекарасын қасақана заңсыз кесіп өту) бойынша жауапқа тартылған.

2022 жылы 10 наурызда мамандандырылған ауданаралық сот оны қылмыстық-атқару жүйесінің қауіпсіздігі барынша жоғары мекемесінде өтеумен 17 жылға бас бостандығынан айыруға үкім шығарды.