Қазақстандық әкім "темір адам" статусына ие болды

ERNUR.KZ. Қарағанды облысы Саран қаласының әкімі Ержан Темірханов Италияда өткен беделді Ironman жарысына қатысып, "темір адам" статусына ие болды. Шенеунік триатолннан өтетін осы жарысқа сегіз ай дайындалған, деп жазады Tengrinews.kz.

Ержан Темірханов жаттығу шараларын биыл ақпанда бастаған. Ол дайындық алаңы ретінде Саран қаласындағы мамандандырылған балалар мен жасөспірімдерге арналған Олимпиадағы дайындық алаңын таңдаған.

"Ержан Оралұлы бізде ақпаннан бері дайындалып келеді. Ол күн сайын келетін, тек жексенбіде ғана демалатын. Күніне екі мезгіл дайындалады: таңертең және кешкі уақытта. Біздің білуімізше ол кісі бұрындары ешқандай спортпен кәсіби тұрғыда айналыспаған. Ол барлығывн нөлден бастап, сегіз айда Ironman атағына ие болды. Онымен біздің тәжірибелі бапкерлеріміз айналысты. Бұл жерде ол Италияға дейінгі екі кезеңді өткерді", - дейді Саран қаласындағы мамандандырылған балалар мен жасөспірімдерге арналған Олимпиадағы дайындық мектебінің басшысы Райымбек Сыздықов.

Темірханов триатлоннан өтетін халықаралық жарысқа қатысатынын көпшілікке айтып жар салмаған. Ол Италияға өздігінен барған.

Ironman жарысы қыркүйектің соңында Италия облыстарының бірінде өткен. Спортшылар 3,8 шақырым жүзіп, 180 шақырымды велосипедпен бағындырып, 42 шақырымды жүгіріп өткен. Жалпы есепте 225 шақырым. Ержан Темірханов осы қашықтықты 11 сағат 46 минут 7 секундта бағындырып, Ironman медалін иеленген.

Шенеуніктің өзі сұхбат беруден бас тартты.

Ержан Темірханов 2017 жылы мамырда Саран қаласының әкімі болып тағайындалды. Оған дейін ол Қарағандыдағы Октябрь ауданын басқарған еді. 38 жастағы шенеунік үйленген және үш баланы тәрбиелеп отыр.