​Мәдениет және спорт министрі кәсіпқой боксшы Бейбіт Шүменовке қатысты пікір білдірді

Ол Шүменовтің ісімен құқық қорғау органдары айналысып жатқанын еске салды.

"Әрбір адам мамандығына, қызмет түріне қарамастан өз сөзі мен әрекетіне жауап береді, оның үстіне жеке өмірі болса. Сол себепті ол құқықтық алаңда өз әрекетіне жауап береді", - деді Оралов үкімет кулуарында.

Осы орайда журналистер спорт министрлігі Шүменовке Қазақстанда өтетін жарыстарға қатысуға тыйым салу мәселесін қарастыра ма деп сұрады.

"Құқық қорғау органдарының жұмысы аяқталғаннан кейін қосымша ақпарат береміз. Құқық қорғау органдары жұмыс істеп жатыр, соттың тиісті шешімі шығады. Осыдан кейін ғана ақпарат бере аламыз. Әзірге араласа алмаймыз", - деді министр.

Еске салсақ, Астанадағы ойын-сауық орталықтарының бірінде кәсіпқой боксшы Бейбіт Шүменов бала көтерген ер адаммен жанжалдасып, оған бірнеше рет соққы жасады. Видео әлеуметтік желіде тарап, қазақстандықтардың наразылығын тудырды.

Қазір Шүменовке қатысты Қылмыстық кодекстің 293-бабы "Бұзақылық" бойынша сотқа дейінгі тергеу жүріп жатыр. Сондай-ақ оған ресми түрде мемлекетаралық іздеу жарияланды.