Несие рақымшылығы: Полиция жалған ақпарат таратқандарды іздеп жатыр

ERNUR.KZ. Алматы полиция әлеуметтік желі арқылы жалған ақпарат таратқандарды іздеп жатыр, деп жазады ҚазАқпарат.

Алматы қалалық полиция департаменті, ҚР Қаржы нарығын реттеу және дамыту агенттігінен тұрғындар арасында несиеге рақымшылық жасау және несиені есептен шығару туралы шындыққа жанаспайтын ақпараттың таралу фактісі бойынша арыз келіп түскенін мәлім етті.

«Қазіргі уақытта қалалық ПД тергеу басқармасы жалған ақпарат тарату бойынша ҚР ҚК-нің 274-бабы 1-бөлігінде көзделген қылмыстық құқық бұзушылық белгілері бойынша сотқа дейінгі тергеу амалдарын бастады. Кінәлілер жасаған іс-әрекеттері үшін қылмыстық жауапқа тартылады»,- деп хабарлады Алматы қалалық полиция департаментінің баспасөз қызметі.

Сонымен қатар, Алматы полициясы азаматтарды жалған хабарламаларға сенбеуге және тек ресми ақпаратты басшылыққа алуға шақырады.

Ұлттық банк кредит рақымшылығы жарияланғаны туралы ақпаратты жоққа шығарды.