Орман өртеніп жатқанда аяқасты жол жөнделді - әкімдік түсініктеме берді

12.06.2023 08:25

467

Абай облысында алапат өрт болды. Өрт кезінде орман шаруашылығының 14 қызметкері қаза тапты.

ERNUR.KZ. Абай облысының әкімдігі орман өртімен күресіп жатқан аумақта жолды неліктен шұғыл жөндегенін түсіндірді, деп жазады sputnik.kz.

"Бородулиха-Жерновка-Поллог аудандық маңызы бар жол учаскесінде көліктің, оның ішінде құтқару қызметтері мен еріктілердің жол қозғалысы артуына байланысты жолдар шұғыл жасала бастады. Автокөліктерге қауіпсіз қозғалысты қамтамасыз ету және шаңды басу үшін шұңқырлар уақытша бітелді", - деді Абай облысы әкімінің баспасөз қызметі.

Бұған дейін кейбір БАҚ Қасым-Жомарт Тоқаевтың баруына орай жол жөнделіп жатыр деп ақпарат таратқан болатын.

Президент бұл туралы оқығанын және білетінін жеткізді.

"Мен келеді деп аяқастынан жол жөндей бастау дұрыс емес. Бұл – мүлдем масқара жағдай. Кінәлілер жазаланады", - деді Тоқаев өрттен қаза тапқан орман шаруашылығы қызметкерлерінің отбасы мүшелерімен кездесуде.

Еске сала кетсек, Абай облысында алапат өрт болды. ТЖМ соңғы деректері бойынша өртті сөндіруге шамамен 1500 адам және 290-нан астам техника жұмылдырылған. Өрт басталғаннан бері барлығы 1000 тоннадан астам су төгілді.

Абай облысында өрт кезінде орман шаруашылығының 14 қызметкері қаза тапты.

Тоқаев 12 маусымды орман өрттерінің құрбандары үшін Жалпыұлттық аза тұту күні деп жариялады.