Павлодар қаласында үшем дүниеге келді

ERNUR.KZ. Павлодар қаласының тұрғыны Айгүлім Қабиденова облыстық перинаталдық орталықта үш сәбиді дүниеге әкелді, деп жазады 24.kz.

Қыздардың есімі – Амина, Карима, ұлдың аты – Әлімжан. Әрқайсысының салмағы 2 келіден астам, бойы – 47,48,49 см.

«Әрине, барлығы Алланың қалауымен болады ғой. Бұл - Алланың бізге берген теңдессіз сыйы. Сәбилердің дені сау, аман болсын. Келініміз үлкен батылдық танытты. Жүктілік кезінде де көңілімізді тауып, жағдайымызды жасап, үйдің берекесін келтіріп жүрді. Балалар айы-күні толық жетіп дүниеге келді. Қуанышымызда шек жоқ», - дейді шақалақтардың әжесі Ағайша Шәріпова.

Үшемнің әкесі Рымбек Қабиденовты құттықтауға әріптестері - «AMANAT» партиясы Павлодар облыстық филиалының атқарушы хатшысы Илья Теренченко бастаған ұжым келді.

«Партия «Бақытты отбасы» маңызды әлеуметтік жобасын жүзеге асыруда. Енді міне, әріптесіміздің отбасында төрт бала бар. Бұл – үлкен қуаныш және сонымен бірге үлкен жауапкершілік. Балалардың болашағы жарқын болсын!», - деді Илья Теренченко.

Денсаулық сақтау басқармасының мәліметінше, бұл - биыл Павлодар облысында дүниеге келген үшінші үшем.