Павлодар облысында көпбалалы ана жантүршігерлік қылмыс жасады

17.02.2021 15:57

2 482

Әйел күйеуінің бауырын пышақтап өлтірді. Сот материалдары бойынша, ол қылмыс жасалған кезде мас болған.

ERNUR.KZ. Павлодар облысында туысын өлтірген көпбалалы ана сегіз жылға бас бостандығынан айырылды, деп жазады sputniknews.kz.

Әйелге неліктен мұндай жаза кесілгенін Павлодар облысының қылмыстық істер жөніндегі мамандандырылған ауданаралық сотының баспасөз қызметі түсіндірді.

Іс материалдарына сәйкес, сотталушы 2020 жылдың қыркүйегінде күйеуінің бауырын пышақтап өлтірген.

Тергеу барысында әйелдің ас үйде болғаны, ал туысы оны балағаттап, жағынан тартып жібергені анықталды. Жауап ретінде әйел оның жүрегіне пышақ сұғып алған.

Оқиға Павлодар облысының Жаңақала ауылында болды.

"Сотталушының кінәсін жартылай мойындағанынан бөлек, оның қылмыс жасағаны сот отырысында толық дәлелденді. Полиция бөліміне жеткізілген әйелді тексеру кезінде орташа мас екені анықталды. Сараптама нәтижесіне сәйкес, одан дене жарақаты табылмаған", - делінген соттың баспасөз хабарламасында.

Сот оның алғаш рет қылмыстық жауапкершілікке тартылғанын, жас балаларының болуын, сондай-ақ оң мінездеме берілуін жеңілдететін мән-жайлар ретінде қарастырды.

Әйел сегіз жылға сотталды, жазасын орташа қауіпсіздіктегі мекемеде өтейді. Сотталушы сот залында қамауға алынды. Үкім заңды күшіне енген жоқ.