Рақымшылық 1500-дей адамды қамтиды.
ERNUR.KZ. Сенаттың жалпы отырысында Парламент депутаттары бастамашылық жасаған «Рақымшылық жасау туралы» Заң жобасы ұсынылды, деп жазады azattyq-ruhy.kz.
«Бұл Заң жобасы Президент Қасым-Жомарт Кемелұлы Тоқаевтың 2022 жылғы 1 қыркүйектегі «Әділетті мемлекет. Біртұтас ұлт. Берекелі қоғам» атты Қазақстан халқына Жолдауындағы ізгілік идеясының негізінде игі ниеттілік танытып, қаңтар оқиғаларына қатысушыларға бір реттік рақымшылық жасау туралы тапсырмасын іске асыру мақсатында әзірленді», - деді депутат Ләззат Сүлеймен.
Ұсынып отырған заң жобасы – қаңтар оқиғасы кезінде жасалған қылмыстар бойынша жауапқа тартылатын адамдарға мемлекет пен қоғам тарапынан гуманизм мен мейірімділік актісі.
«Тергеу органдары қаңтар оқиғасы кезінде қылмыстық құқық бұзушылық жасаған 1600-дей адамды анықтап, оларды жауапқа тартып жатыр. Оның ішінде 1 112 адамға сот үкімі шығарылды. Басқаларының ісі тергеу сатысында. Рақымшылық сотта да, тергеуде де қолданылады. Жасалған қылмыстардың нақты уақыт аралығы және рақымшылыққа іліккен азаматтар тобы белгіленді. Заң жобасы теріс қылық, ауырлығы төмен және орташа қылмыс жасағандарды жазадан толық босатуды көздейді. Ал жазасын өтеп шыққандардан соттылық алынады», - деді ол.
Депутат атағандай, ауыр және аса ауыр қылмыстарды жасағандарға жаза мерзімдерін қысқарту көзделген.
«Ауыр қылмыс үшін сот тағайындаған мерзімнің төрттен үш бөлігі, ал аса ауыр қылмыс үшін мерзімінің жартысы қысқарады. Егер сотталған тұлғаның жазаны өтеу мерзімі бір жылдан аз болса, онда ол толықтай жазаны өтеуден босатылады. Жалпы рақымшылық 1500-дей адам қамтиды. Негізінен олар – заңсыз үгіт-насихатқа еріп, ұрлық, бүлік, өртеу жасағандар. Бұл тұлғалар сотпен жазаның неғұрлым жеңіл түріне тартылуда. Яғни, гуманизм қағидасы қылмыс жасаған адамдарға осыған дейін де қолданылды. Сонымен қатар заң жобасымен босатылатын адамдарды әлеуметтендіру көзделеді. Бұл бағытта уәкілетті органдардың бұрын өткізілген рақымшылықтар барысында жинақтаған тәжірибесі бар. Соған сәйкес тиісті жұмыс атқарылады», - деді ол.
Айта кетейік, рақымшылық террористер, экстремистер, рецидивистер, азаптау жасағандар, тәртіпсіздік ұйымдастырушылар, мемлекетке опасыздық жасаған адамдарды қамтымайды.
Сенат депутаттары бір реттік «Рақымшылық жасау туралы» заң жобасын мақұлдады.
