Шахматты мектеп бағдарламасына енгізу бойынша пилоттық жоба басталды

ERNUR.KZ. Қазақстанда шахматты дамыту жоспары мен елдегі мектептерге қосымша сабақтар енгізу жөнінде өңірлік коммуникациялар алаңында RAI бірінші вице-президенті, Азия шахмат федерациясының вице-президенті Дәрмен Сәдуақасов айтып берді, деп жазады inbusiness.kz.

Спикердің айтуынша, келесі оқу жылынан бастап, шахматты 1-4 сынып оқушыларына қосымша пән ретінде енгізу тәжірибесі басталады. Бастапқыда оған 30 мектеп қатысады.

"ҚШФ Мемлекет басшысының және біздің бас демеушіміздің қолдауымен елде шахматты жүйелі түрде дамытып келеді. Бүгінде бізде шахматты одан ары дамыту үшін барлық мүмкіндік бар. Өздеріңіз білетіндей, біздің әйелдер құрамасы әлемдегі үздік шахматшылар қатарында. Сәуір айында біз әлем құрамасымен матч өткіздік. Біздің балалар мен жасөспірімдер құрамасы да әлемде үздіктердің қатарында және осы бағытта біз ерлер құрамасын қалыптастырып, таланттарды іріктеу жұмыстарын күшейтеміз", - деді Дәрмен Сәдуақасов.

Спикердің сөзіншн, Федерация Оқу-ағарту министрлігі және Ғылым және жоғары білім министрлігімен бірлесіп әдістемелік жұмыс жүргізген. Сондай-ақ, оған халықаралық сарапшылар тартылып, осыған ұқсас жоба енгізілген Испанияның кейсі зерттелді.

"Біз үшін бұл өте маңызды бағыт, бұл - балаларға сапалы шахмат білімін беру мүмкіндігі. Біздің мақсатымыз – еліміздегі әрбір бала, бастауыш сынып оқушылары, мейлі ауыл, мейлі қала мектебі болсын, өз таңдауы бойынша шахматпен айналыса алса деген ой. Шахмат адамның ой-өрісін дамытады, ол логиканы, есте сақтау қабілетін, сыни ойлауды, назарды шоғырландыруды дамытуға үлкен импульс береді. Қазақстанда біз осы сипаттағы ғылыми жұмысты 12 мектеп негізінде жүргіздік", - деп бөлісті ол.

Сонымен қатар, шахмат үйрететін оқытушыларды дайындау мен олардың біліктілігін арттыру жұмыстары да жүргізілуде.