Солтүстік Қазақстанда 13 жасар қыз түсік жасатқан

ERNUR.KZ. Өткен жылы Солтүстік Қазақстан облысында жасөспірімдер 14 түсік жасатқан. Оның ішінде 13 жасар қыздың жүктілігі тоқтатылған. Сол жастағы тағы бір қыз ана болды, деп жазады azattyq-ruhy.kz.

Аймақта барлығы 15 пен 49 жас аралығындағы 116 мыңнан астам әйел тұрады. 2880 әйел жүктілік бойынша диспансерлік есепте тұр. Олардың 52 пайызы әртүрлі жыныстық патологиялардан зардап шегеді.

Облыстың денсаулық сақтау басқармасының штаттан тыс бас акушер-гинекологы Елена Калюжнаяның айтуынша, барлық жүкті әйелдер өңірдің медициналық мекемелерінде есепте тұр.

«Облыстағы жасөспірім қыздарды біз бақылап отырмыз. Төрт пайызы ауыр жыныстық патологиядан зардап шегеді. Барлығы есепте. Ерте жүктіліктің зиянын түсіндіруге көп көңіл бөлеміз. Жастар орталықтарында әңгімелесулер өткіземіз, тіпті контрацепция құралдарын тегін береміз. Өкінішке орай, биыл төрт жасөспірім қыз медициналық түсік жасатқан», - деді Калюжная.