Жамбыл облысында жаңа туған нәрестені сатқан акушерлер сотталды

27.10.2023 08:51

372

Прокурор сотталушыларды 9 жылға бас бостандығынан айыруды сұрады.

ERNUR.KZ. Жамбыл облысында перзентхананың екі акушері жаңа туған нәрестені сатқаны үшін (ҚК-нің 135-б. 2-б. 1,7,12-т.) сотқа тартылды, деп жазады zakon.kz.

Жамбыл облысының кәмелетке толмағандардың істері жөніндегі мамандандырылған ауданаралық сотының хабарлауынша, 2022 жылдың қараша айында жәбірленуші жүктілікті мерзімінен бұрын тоқтату мақсатында, аурухананың перзентхана бөлімінің акушері Б.-ға хабарласқан. Жәбірленушінің жүктілігін отбасынан жасырғанын түсінген Б., өзінің әріптесі Ю.-дан босанғаннан кейін баланы сатуға көмек сұраған. Өзінің қылмыстық ниетін жүзеге асыру үшін (яғни адамдар тобымен алдын ала сөз байласу арқылы) акушерлер жәбірленушіні алдау және сенімін теріс пайдалану арқылы жаңа туған нәрестені азаматқа 1,5 млн теңгеге сатқан. Сотталушылардың кінәсі жәбірленушінің заңды өкілінің, куәлердің айғақтарымен, сараптамалардың қорытындыларымен және заттай дәлелдемелермен объективті растауын тапты.

Прокурор сотталушыларды 9 жылға бас бостандығынан айыруды сұрады. Сотталушылар кінәлерін ішінара мойындады.

ҚК-нің 135-б. 2-б.-нің санкциясы 9 жылдан 12 жылға дейін бас бостандығынан айыру түріндегі жазаны көздейді. Қылмыстық жауаптылық пен жазаны жеңілдететін мән-жай ретінде бір сотталушының жас балаларының болуы танылды. Ауырлататын мән-жайлар анықталған жоқ. Жасалған қылмыстың сипаты мен қоғамдық қауіптілік дәрежесін, сондай-ақ ҚК-нің 55-б. 2-б.-ның жазалау шегін шектейтін талаптарын ескере отырып, сотталушылар 8 жылға бас бостандығынан айырылды. Үкім заңды күшіне енген жоқ.