ШЫМКЕНТ: Атаулы әлеуметтік көмекке өтінішті онлайн тапсырушылар қатары артты

30.04.2021 15:32

750

Сәуір айынан бастап атаулы әлеуметтік көмекке өтініштер электрондық үкімет порталы арқылы онлайн форматта қабылдануда.

Шымкент қаласында атаулы әлеуметтік көмекке өтінішті онлайн тапсырушылар қатары артты, деп хабарлайды ERNUR.KZ.

Сәуір айының басынан атаулы әлеуметтік көмекке өтініштер электрондық үкімет порталы арқылы онлайн форматта қабылдануда. Шымкентте АӘК-ге құжатты онлайн рәсімдеуге жүгінгендер қатары көбейген. Қалалық жұмыспен қамту орталығының мәліметінше, бүгінгі күнге жаңадан келіп түскен 19 408 өтініштің 6704-і электрондық үкімет порталы арқылы тапсырылған. Бұл – небәрі 1 ай ішіндегі көрсеткіш.

Аз қамтылған азаматтар мен көпбалалы отбасылар құжаттарын Egov.kz сайты арқылы тапсыра алады. Өтініштерін қашықтан тапсырулары үшін электронды цифрлық қолтаңбалары (ЭЦҚ) болуы керек. Бұл тұрғындарға өте ыңғайлы әрі орталыққа келіп әуре болмайды.

Көп жағдайда атаулы әлеуметтік көмекке жұмыс істеп жүрген азаматтар да өтініш тапсырады. Ондай жағдайда кіріс табысы ескеріліп, кедейшілік шегінің 70 пайызынан асқан жағдайда бас тартылады. Жұмыссыз жүрген азаматтарға қалалық жұмыспен қамту орталығы тарапынан «Жұмыспен қамтудың» белсенді шараларына қатысу ұсынылуда.