Шымкентте тойханаларын мектепке айналдырғысы келетін кәсіпкерлер көбейді

Шымкентте тойханаларын мектепке айналдырғысы келетін кәсіпкерлер көбейді, деп хабарлайды ERNUR.KZ.

Бұл туралы қалалық білім бөлімінің басшысы Жанат Тәжиева мәлімдеді.

- Бүгінгі таңда қаламыздағы тойхана ғимараттарын қайта құрылымдау арқылы білім ошағына айналдыру тәжірибесі бірнеше тойхана иелеріне де ой салуда, - деді білім басқармасының басшысы.

Басқарма басшысы бүгінде мектеп салуға ниет білдірген кәсіпкерлердің саны артқанын да тілге тиек етті. Оның айтуынша алдағы уақытта инвесторлар есебінен 6 мега, 10 зияткерлік, 1 халықаралық деңгейдегі мектептерге басымдық беріледі. Тағы 46 әлеуметтік мектеп салу жоспарланған.

Жалпы Шымкентте оқушылар саны 15 мыңнан асады. Биылдың өзінде 23 мың оқушы мектепке кезекте тұр. Бұл өсім 5 жылда 75 мыңға жетеді. Ал кешенді жоспар бойынша 2025 жылға дейін 64 900 орынға арналған 85 мектеп салынады.

2021 жылы қаладағы апатты мектептердің жағдайы толық шешіледі. Бір сыныпта 35-40 оқушы оқитын12 мектеп 2022 жылы, ал үш ауысымдағы 13 мектептің мәселесі 2023 жылы толық шешімін табады.