Шымкентте ойынханаға келген мас ер адам кассадан 2 миллионнан астам теңгені ұрлап кетті

Бұл туралы Шымкент қаласы полиция департаментінің баспасөз қызметі мәлімдеді.

Ведомство мәліметінше, 32 жастағы лудоман кешкі уақытта мас күйінде ойынханаға келіп, түрлі ойын автоматтарында ойнай бастаған. Келесі күні таңертең ер адам қолындағы барлық ақшаны ұтылып қалғанын түсінеді. Содан азамат кассада тұрған қызды әңгімеге тарта бастаған. Бір уақытта оны итеріп жіберіп, кассадан 2 миллионнан астам теңгені алып, белгісіз бағытқа бой тасалайды.

"Мекеменің қызметкерлері Әл-Фараби ауданы Полиция басқармасына арызданады. Аталған жайт ҚР ҚК-нің 191-бабымен "тонау" тіркелген. Тәртіп сақшылары тонауға қатысы бар адамды анықтау мақсатында сол күні ойынханада болғандардан жауап алып, мекемеге орнатылған бейнебақылау камераларын жіті қарады. Нәтижесінде осындай мазмұнды қылмыспен бірнеше рет сотты болған ер адам анықталды. Қалада орналасқан Жедел басқару орталығының бейнебақылау камералары арқылы күдіктінің жүру бағыты белгілі болып, полицейлер оны қала аумағынан ұстады", - делінген баспасөз хабарламасында.

Тоналған ақша заңды иелеріне қайтарылды. Қылмыстық әрекетке барғаны үшін азамат 5 жылға бас бостандығынан айырылды.