Екі құрама арасында тартысты ойын өрбіді.
ERNUR.KZ. Футболдан Қазақстан мен Черногория құрамалары арасындағы жолдастық кездесу 0:0 есебімен тең аяқталды, деп жазады ҚазАқпарат.
Екі құрама арасында тартысты ойын өрбіді. Кездесу алдында Қазақстан құрамасы түрлі себеппен бірқатар футболшыны қатарға қоса алған жоқ. Соған қарамастан қазақстандық ойыншылар жинақы қимыл көрсетті. Ойын барысында гол соғатын бірнеше мүмкіндікті мүлт жіберіп алды.
Черногория құрамасының да есепті өзгертетін бірнеше мүмкіндігі болған еді. Десе де оларға да дәлдік жетіспей жатты.
Кездесу 0:0 есебімен тең аяқталды.
Естеріңізге сала кетелік, бұған дейін екі құрама үш мәрте кездесті. 2008 жылдың 27 мамырында Подгорицеде өткен жолдастық кездесуде олардан 0:3 есебімен жеңіліп қалды. Одан кейін екі құраманың жолы 2018 жылғы әлем чемпионатына іріктеу кезеңінде Е тобында түйісті. Алдымен 2016 жылдың 8 қазанында Подгорицеде 0:5 есебімен есе жіберген қазақстандық құрама 2017 жылдың 1 қыркүйегінде елордада оларға 0:3 есебімен есе жіберді. Сондықтан Қазақстан мен Черногория бүгін алғаш рет тең түсіп отыр. Дегенмен қазақстандық футболшылар төрт ойын бойы аталған қарсыласына бірде-бір гол соға алмай келеді.
Естеріңізге сала кетелік, Қазақстан құрамасы енді Ұлттар лигасында екі ойын өткізеді. Алдымен 15 қазанда сырт алаңда Албаниямен шеберлік байқасса, 18 қарашаа өз алаңында Литваны қабылдайды. Қазақстан С лигасында төртінші топта сынға түсіп жүр.
