ТҮРКІСТАН: Ерекше қажеттілігі бар жандар жеңіс тұғырынан көрінді

Тараз қаласында еркін және грек-рим күресінен есту қабілеті төмен спортшылар арасында Қазақстан Республикасының кубогы өтті, деп хабарлайды ERNUR.KZ.

2022 жылдың 25-27 ақпан күндері Тараз қаласында еркін және грек-рим күресінен есту қабілеті төмен спортшылар арасында Қазақстан Республикасының кубогы өтті. Аталған сайысқа Түркістан облысы, Сарыағаш ауданы, Қабланбек ауылдық округіне қарасты Ташқұлақ елді мекенінің тұрғыны Ерман Оңласын мен Құркелес ауылдық округі, Еңкес елді мекенінің тұрғыны Асроров Ихтияр қатысып, жүлделі орындарға ие болды.

Атап айтқанда, грек-рим күресінен Ерман Оңласын жеңімпаз атанса, еркін күрестен 3-орынды иеленді. Ал, Асроров Ихтиёр еркін күрестен 2-орынға, грек-рим күресінен 3-орынға ие болды. Қазіргі таңда Сарыағаштық балуандар облыстық «Сауран» спорт клубында Қазақстан Республикасының чемпионатына тыңғылықты жаттығуларын бастап кетті.

Айта кетейік, ерекше қажеттілігі бар жандардың жігерін ынталандырып, жеңіс тұғырына жетелеп, өз бойындағы күш-қуат қасиетін шәкірт бойына баули білген білікті бапкерлердің еңбегі ерекше. Жігері жасымаған жандардың алдағы уақытта да жеңіс тұғырынан көрініп, толайым табыстарға жетуіне тілектеспіз.