Түркістанда теңдесі жоқ жобалар жүзеге асырылады

Түркістан қаласында республикада теңдесі жоқ жобалар жүзеге асады, деп хабарлайды ERNUR.KZ.

Түркістан облысының орталығында елімізде теңдесі жоқ жобалар жүзеге асырылады. Солардың бірі – халықаралық талапқа сай ескек есу базасы. 80 гектардан астам аумақты алып жатқан базада ескек есу, академиялық есу және өзге де спорт түрлері дамиды. Бұл нысан туристерді тартатын орталыққа да айналмақ. Кәсіби спортпен қатар мұнда қайықпен серуендеп, жағажай волейболын ойнап, демалысты өткізуге болады. Сондай-ақ Түркістан қаласының климатын өзгерту, жасыл алқапты көбейту бағытында да ескек есу базасының маңызы зор.

Сонымен қатар, облыс әкімі «Мұз сарайы», Б.Саттарханов атындағы спорттық-сауықтыру орталығы, теннис орталығы және футбол академиясын салу жұмыстарын саралап, мердігерлер мен жауапты басшыларға тапсырмалар берді.

Аталған спорт нысандары халықаралық жарыстар өткізумен қатар түрлі спорт түрлерінен командалардың оқу-жаттығу жұмысын өткізуіне де оң серпін бермек. Яғни, жаңа спорт нысандары өңірге келушілер санының артуына тікелей үлес қосады.