Британия қорғаныс министрлігі: Ресейге әскери шығынын қалпына келтіру үшін жылдар керек

ERNUR.KZ. Ұлыбритания қорғаныс министрлігі 2 мамырда таратқан соғыс жайлы есебінде соғыс басталғалы Ресей әскерінің біраз бөлігі қатардан шығып қалды деді, деп жазады azattyq.org.

Қақтығыс басталғанда Ресей тактикалық 120 батальонын шығарған. Бұл Ресейдің құрлық әскерінің 65 пайызын құрайды. Қазір бұл күштердің төрттен бірі қатардан шығып қалуы мүмкін. Бәрінен бұрын Ресейдің элиталы әскері - әуе-десант күштері көп зардап шекті. Ресейге бұл әскери шығынды қалпына келтіру үшін жылдар керек" деп деді қорғаныс министрлігі.

Өткен аптада Ұлыбритания қорғаныс министрі Бен Уоллес Ресей басшысы Владимир Путиннің 9 мамыр Жеңіс күні мобилизация жариялауы мүмкін екенін айтқан.

Құпия дереккөзге сүйенген британдық Daily Mail басылымы ресейлік генералдардың Украинадағы соғыс нәтижесіне көңілі толмайтынын және шабуылды жалғастыру үшін қосымша күш қажет екенін жазды.

Алайда мобилизация жариялануы үшін Ресей соғыс жүріп жатқанын мойындауы керек. Осы күнге дейін Кремль Украинаға басқыншылығын "арнайы әскери операция" деп атап келген. Бұған қоса, Ұлыбритания қорғаныс министрлігі соғыста Ресей 15 мың адамынан айырылды деп санайды. Ал Ресей қорғаныс министрлігі наурыздың соңынан бері әскери шығыны жайлы мәлімет таратпай отыр. 25 наурызда Ресей 1351 әскериі қаза болғанын жариялаған.