Камчаткадағы ұшақ апаты: алты адамның денесі табылды

ERNUR.KZ. Камчаткадағы Палана ауылының маңындағы ұшақ апатынан қаза тапқан алты адамның денесі табылды, деп жазады sputniknews.kz.

Ресми мәліметке сәйкес, жолаушылар ұшағы Петропавловск-Камчатский қаласынан Палана кентіне адам тасымалдаған. Осы жолы тура жерге қонардың алдында байланысқа шықпай қалған.

Бортта экипаждың 6 мүшесі және 22 жолаушы, оның ішінде бір бала болған. Алдын ала дерек бойынша олардың барлығы қайтыс болды.

Камчаткада ұшақ апатына байланысты аза тұту күні жарияланды.

Құтқарушылар іздестіру жұмыстарын ауа райының қолайсыздығын ескере отырып жүзеге асыруда.

Желіде ұшақ апаты болған жерден видео жарияланды.

Ресей Федерациясының тергеу комитеті ұшу қауіпсіздігі ережелерін бұзу фактісі бойынша қылмыстық іс қозғады. Агенттік ұшақтың апатқа ұшырауының үш ықтимал нұсқасын қарастырады: қолайсыз ауа райы, әуе кемесінің техникалық ақаулары және ұшу барысындағы қателік.

Ұшақ апатынан қаза тапқандардың туыстары әрқайсысы 2 миллион рубльден, ал әуежайдан тағы 1 миллион рубльден сақтандыру төлемін алады.