Қырғызстан мен Тәжікстан шекарасында тағы да атыс болды

ERNUR.KZ. Қырғызстан мен Тәжікстан шекарашылары арасында атыс болды, деп жазады Tengrinews.kz.

Қырғызстан шекара қызметінің деректеріне сәйкес, шамамен сағат 10.50-де Баткен ауданының Тескей шекара аумағында Тәжікстанның шекара жасағы бұрынғы қозғалыс бағытын өзгертіп, күзеттің жаңа шебіне шығып, Қырғызстан шекарашыларынан осы аумақтан кетуін талап еткен.

Портал мәліметінше, көп ұзамай Тәжікстан шекарашыларына қосымша күш келіп, олар сан жағынан басым екенін пайдаланып, жаңа шекараға шығуға тырысқан. Қырғыз шекарашылары өз кезегінде қарсылық көрсеткен. Атыс шамамен 10 минутқа созылған.

Қырғыз тарапынан жаралылар мен зардап шеккендер жоқ. Алайда алдын ала мәліметтер бойынша, тәжік тарапынан жараланғандар бар.

24.kg мәліметінше, екі елдің шекара өкілдері шекара жасақтарын оқиға орнынан алып кетуге шешім қабылдаған. Сонымен қатар, келіссөздер жүргізіп жатыр. Тескей аймағы мемлекеттік шекараның белгіленбеген аумағы болғанымен, оны Қырғызстан азаматтары пайдаланады. Ал Баткен облысында орналасқан шекара бөлімшелері күшейтілген қызмет түріне ауыстырылған.