​Желке мен иықтың күжіреюі жаныңызға батса...

фото: creekstonecare.com

Желкенің күжіреюі, жота тұсында шоқтықтың пайда болуы... Бұлар — жас ұлғая келе кез келген адамда болатын жайсыздықтар. Тек, өз мүсіні мен денсаулығына уақытылы көңіл бөліп, тиісті амал жасағандарда ғана болмайды. Бұл жерде «денсаулық» деген сөзді неге қолдандық? Өйткені, желкенің күжіреюі сымбатты бұзып қана қоймай, саулыққа да зиянын тигізеді. Сондықтан, онымен кеш болмай тұрғанда күресіңіз.

Желкенің күжіреюі бұл — мойын омыртқа тұсында артық май тіндерінің жиналуы.

Неден пайда болады?

• Гормоналдық бұзылыс;
• Тым жұмсақ төсек пен биік жастықта жату;
• Әйелдердегі климакс кезеңі;
• Тұқым қуалаушылық;
• Кальций жетіспеушілігі мен остеопороз;
• Мойын остеохондрозы;
• Мойын мен иыққа шамадан тыс физикалық күш түсіру;
• Омыртқаның зақымдануы;
• Ұзақ уақыт еңкейіп отыру (компьютер алдында, тігіс тігу, оқу, т.б.).

Міне, осы себептерден желкеңіз күжірейіп, екі жауырын арасында жота пайда болады. Қай себеппен пайда болса да, берілмеңіз. Онымен күресіп, кетіруге мүмкіндік бар.

Денсаулыққа неге зиян?

• Омыртқа артериясына қысым түсіреді;
• Мойынның талуы жиі сезіледі;
• Үздіксіз бас ауруына себеп болады;
• Мойын, желке тұсында ауырсынулар туғызады;
• Бас айналу, жүрек айну сынды жайсыздықтар пайда болады.

Қалай күресу керек?

• Қатты төсек және тым биік емес жастық жастану арқылы дұрыс ұйқыны қамтамасыз ету;
• Йога және пилатеспен айналысу.
• Артық тамақтанбау, қуырылған және майлы, тәтті тағамдарды, газдалған сусындарды тұтынбау, т.с.с. дұрыс тамақтану ережелерін ұстану;
• Мойын омыртқасына жиі массаж жасап тұру;
• Көп қимылдау;
• Дене салмағын бақылауда ұстау;
• Ағзаның гормоналдық жай-күйінің қалыптылығын қамтамасыз ету;
• Отырғанда да, тұрғанда да арқаны тік қалыпта ұстауды қадағалау.

Қандай жаттығулар жасаймыз?

Жоғарыда аталғандарға қосымша, келесі жаттығулар кешені де желке күжіреюіне қарсы күресте сенімді серік бола алады.

Баспен жасалатын жаттығулар:

• Бас пен мойынды барынша алға қарай созып, кейін қайта артқа қайтару;
• Екі иықты алға-артқа айналдыра отырып жауырынды барынша қимылға келтіру.

Мойынды екі бағытта айналдыру (оңға және солға);

Басты оңға-солға қарай бұру;

Иекпен пішіндер сызу

Басты назарды иекке аударып, онымен ауада түрлі геометриялық пішіндер сызу. Айталық, дөңгелек, үшбұрыш, шаршы, т.б. Бұл өте қарапайым қимылдар болғанымен, қаңқа бұлшықеттерінің нығаюына ықпалы зор.

«Қайықша» жасау

Еденге екбеттеп жатып, аяқ пен қолды тік ұстаған күйде бір мезетте жоғары қарай көтеріңіз. Осы «Қайықша» қалпында бірнеше секунд тұрыңыз. Шамаңыз жетсе, денені аздап алға-артқа тербелтсеңіз, тіпті жақсы.

«Мысық» жаттығуы

Еденге еңбектеп тұрып, арқаны ішке және сыртқа қарай кезекпен-кезек иеміз. Сыртқа қарай күжірейте шығарғанда басты барынша төмен салбыратып, арқаны ішке қарай иген кезде басты жоғарыға барынша көтеру керек.

Тегіс еденге шалқалап, аяғыңызды тізеден бүгіп жатыңыз. Табаныңыз жерге толық тиіп тұратын болсын. Енді екі қолды шынтақтан бүгіп, екі жаққа қарай жіберіңіз. Осы қалыпта жауырыныңызға, иық бұлшықеттеріне қандай күш түсіп жатқанын айқын сезінетін боласыз. Келесі кезекте екі білекті бірдей жоғары көтеріп, бас тұсына қарай апарыңыз. Қолдарыңызды жерге тигізген соң бастапы қалыпқа қайта келтіріңіз. Осы жаттығуды 8 рет қайталаған соң, екі қолмен алма-кезек жасаңыз.

Екі аяқты айқастырып еденге отырыңыз. Қолдарыңызды екі жаққа қарай жайыңыз. Енді оларды шынтақтан бүгіп, артқа қарай барынша қайырыңыз. Осылайша 4-6 рет қайталау жеткілікті. Жаттығуды жасау кезінде иықты көтермеуді басты назарда ұстауға тиіссіз.

Еденге қайта екбеттеп жатып, екі қолды артқа қарай жіберіңіз. Алақанды жоғары қарата, саусақтарды айқастырыңыз. Қолыңызды арқаға қойған күйі иықтарыңызды жоғарыға көтеріңіз. Енді қолды да жоғары қарай көтеруге тырысыңыз. Артқа қарай денеңізді барынша созып, сонсоң бастапқы қалыпқа қайта келіңіз. Жаттығуды 4-5 рет қайталаңыз.

Барлық жатығулардың қайталау саны мен ұзақтығы жасаушының өзін қалай сезінетіндігіне байланысты. Бастапқыда бұлшықеттердің ауырсынуын, сіңірдің созылуын болдырмау маңызды. Сол үшін аз-аздан (әрқайсысын 5-7 реттен қайталау) бастау қажет. Бірте-бірте қайталау санын арттыра бересіз. Біршама уақыт пен еңбек өз нәтижесін міндетті түрде көрсететін болады.

Дайындаған: А.Бектұрғанова,

ERNUR.KZ