Алматыдағы трагедия: халықаралық тергеу жүргізіле ме

"Ондай тергеудің қажеті бар деп ойламаймын. Өзіміз істей аламыз. Бізде адал және бәрін ашық айтатын адамдар бар. Олар қоғамдық комиссияларды басқарады. Мен де, әкімшілігім де сол комиссиялардың құрылуына қатысқан жоқ. Адамдар өз еркімен құрды, жұмыс істей берсін. Өзім де ақиқатты, шындықты білгім келеді", - деді Тоқаев "Хабар" арнасына берген сұхбатында.

Осы орайда ол Еуропарламенттің резолюциясына қатысты өз ойын айтты.

"Олар осымен екінші резолюцияны қабылдап жатыр, тым ерте қимылдап отыр. Ол резолюция - лоббистердің әрекеті. Ал лоббистер өз адамдарымыздың тапсырысы бойынша жұмыс істеп жатыр. Ол адамдар кезінде Қазақстанда қыруар ақша тапқан. Артынан шетелге кетіп қалды. Енді ол ақшаны наразылықтарды ұйымдастыруға және адамдарды бір-біріне айдап салуға жұмсап жатыр", - деп атап өтті Тоқаев.

Президент қазақ және өзбек байларын салыстырып, біздікілердің негізгі айырмашылығын көрсетті.

"Өзбекстанның байлары қыруар қаржыны өз елінен тыс жерде тапқан. Бірақ тарихи отанына барып, Өзбекстан президентінен "өзбек халқына не істей аламыз, қандай пайдамызды тигізе аламыз" деп сұрайды екен. Сөйтіп өз ақшасына аурухана салып, инфрақұрылым тартып береді", - деді Тоқаев.

Президенттің айтуынша, қазақ пен өзбек олигархтарының негізгі айырмашылығы осы.

"Біздікілер осында жүрсе немесе шетелде жүрсе, өз еліне шабуыл жасайды", - деп ренішін білдірді Тоқаев.