"Алтын Орда" базарындағы жанжал: қылмыстық іс тоқтатылды

ERNUR.KZ. Алматы іргесіндегі «Алтын Орда» базарында жанжалдасқан көлік жүргізуші мен автотұрақ қызметкері татуласып, қылмыстық іс тоқтатылды, деп жазады ҚазАқпарат.

«Алтын Орда» базарында жанжалдасқандар татуласып, қылмыстық іс тоқтатылды. Қос тарап өз кінәларын мойындап, бір-бірлерінен кешірім сұрады және істің тоқтатылуын өтінді», - делінген Алматы облыстық Полиция департаменті баспасөз қызметінің ресми мәлімдемесінде.

Естеріңізге сала кетейік, 30 наурыздағы екі азамат арасындағы жанжал автотұрақ ақысына қатысты шыққан. Қалтасында 100 теңгенің жоқтығын айтқан көлік жүргізушісі 20 мың теңге бере алатынын болмаса төлемді банк картасына ақша аудару арқылы жасай алатынын жеткізеді. Бірақ автотұрақ қызметкері аударымды қабылдай алмайтынын айтып, көлік иесінің автотұрақтан шығуын өтінеді. Осы сәтте тұрақ қызметкерінің сөйлеу мәнері ұнамаған жүргізуші көліктен түседі. Ары қарай сөзге келіспей қалған азаматтар арасында жанжал туындайды. Жазбаға көлік қожайынына қызметкердің пышақ ала жүгірген сәті мен жүргізушінің автотұрақта жұмыс істейтін азаматты жағасынан алып, басымен ұрған кезі түсіп қалған. Артынша базарға келген адам көлігіне отырып, оқиға орнынан кетуге әрекеттенеді. Осы сәтте базардағылар көліктің кетуіне кедергі жасауға тырысады. Істің насырға шапқаны сонша осы кикілжіңге қатысты қылмыстық іс қозғалды.

«Бұзақылық» бабы бойынша қозғалған іс қос тараптың татуласуына байланысты тоқтатылды.