Арыс мектептерінің түлектері ҰБТ бойынша кейінірек аппеляцияға жүгіне алады

ERNUR.KZ. Білім және ғылым министрлігі Арыста ҰБТ тапсырған барша түлектер жарылысқа байланысты апеляциялық комиссияға кейінірек өтініш білдіре алатынын айтты, деп жазады nur.kz.

Бұл туралы орталық коммуникациялар қызметіндегі брифингте жоғары және жоғары оқу орнынан кейінгі білім департаментінің директоры Әділет Тойбаев мәлімдеді.

Оның сөзінше, Арыс қаласында ҰБТ-ның 1 пункті бар. Ол қаладығы №1-ші мектепте орналасқан. Ол жерде 21 маусым және 23 маусым күндері ҰБТ өткен.

"Жалпы Арыста 779 бала өтінішін қалдырған еді. Оның 772-сі екі лекпен тапсырды. Кеше, 24 маусым күні сағат 9.00-де Арыс қаласының №1 мектебінде апелляциялық комиссия өз жұмысын бастаған. Алайда әскери бөлімшедегі жарылыстардың салдарынан жұмысын тоқтатты", - деді Тойбаев.

Департамент басшысы төтенше жағдай салдарынан оқушы мен комиссия мүшелері зардап шекпегенін атап өтті.

"Осы қалада министрлік өкілдігінің 12 мүшесі жұмыс істеді. Қазіргі уақытта олардың 12-сі де Шымкент қаласында. 10-ы Нұр-Сұлтан қаласына шығайын деп жатыр.

Комиссия төрағасы сол жерде қалады. Жалпы жағдай тұрақталған соң бұл апелляцияны өткізетін боламыз", - деді Әділет Тойбаев.