Әсел Айтпаеваның өлімі: Тергеу Қазақстан мен Грузияда қатар жүріп жатыр

ERNUR.KZ. ҚР Ішкі істер министрі Ерлан Тұрғымбаев Грузияда жүріп жатқан жерлесіміз Әсел Айтпаеваның өліміне қатысты тергеу барысы туралы пікір білдірді, деп жазады zakon.kz.

Тұрғымбаевтың айтуынша, іс Қазақстан мен Грузияда қатар тергеліп жатыр.

Осы қылмыстық іс бойынша біз бірнеше тергеу әрекеттерін жүргіздік, атап айтқанда адам саудасы бойынша. Қазір басты айыпталушы ұсталды, қамауға алынды, тергеу амалдары жүргізілуде, бірқатар тергеу әрекеттері жүргізілді. Сонымен бірге, Грузиядағы әріптестеріміз Грузияда өзін-өзі өлтіруге итермелеу бабы бойынша тергеу жүргізіп жатыр. Біз Грузия полициясымен тығыз жұмыс жасаймыз. Бірақ, сонымен бірге, бұл арада тергеу әрекеттері аяқталғанға дейін тергеу материалдарын жариялай алмайтынымды жеткізгім келеді. Тергеу біздің әріптестерімізбен тығыз байланыста жалғасуда, - деді Тұрғымбаев.

26 жастағы қазақстандық Әсел Айтпаева 5 мамырға қараған түні Грузияда түсініксіз жағдайда қайтыс болды. Қыз тоғызыншы қабаттың терезесінен құлап кеткен. Қыздың туысқан әпкесі Әсел қайтыс болар алдында құрбысына аудио жазба жолдап үлгергенін айтты. Одан белгісіз ер адамның оны балағаттап, қорқытып-үркітіп жатқанын естуге болады. Тергеу барысында Грузия азаматы Зугдиди Бесик Тордуа ұсталды, ол зорлау және суицидке жеткізу бойынша айыпталады.

Сонымен қатар, Нұр-Сұлтан қалалық полициясы Әселдің Мұрат Мейірбеков деген алыс туысын ұстады. Оған адам сатты деген айып тағылып отыр. Бұқаралық ақпарат құралдары Грузияға келгеннен кейін Рустави қаласында бірге тұрған туысы Мейірбеков қызды сатып жіберген деп жазды.