Біз әрқашан журналистердің жағындамыз – ақпарат министрі

Ол министрлік әр уақытта журналистердің құқығын қорғауға дайын екенін мәлімдеді.

"Мен ол журналистермен кездестім, сөйлестім. Басқаларға да қолдау көрсетуге әзір екенімізді жеткіздік. Президент арнайы тапсырма берді, сол бойынша кейбір азаматтар ұсталып жатыр. Сондықтан біз өз бақылауымызда ұстап отырмыз. Әр уақытта журналистердің жағында және оларды қолдауға әзір екенімізді тағы да қайталаймын", - деді Қыдырәлі үкімет кулуарында.

Осы орайда журналистер министрден "Қазақстанда қазір журналист болу қаншалықты қауіпті" екенін сұрады.

"Мен оны айта алмаймын. Құқық қорғау органдарының жұмыстарынан кейін ғана баға бере аламыз. Бірақ бізде ақпараттық шабуылдың көбейіп кеткені белгілі. Бұл мәселеде біз әр уақытта журналистердің құқығын қорғауға әзірміз", - деді ол.

Соңғы уақытта бірнеше журналист белгісіз біреулер редакция терезесін сындырып, көлігін өртеп, есігін құрылысқа арналған көбікпен бұғаттап тастады деп шағымданған болатын.

Мемлекет басшысы Қасым-Жомарт Тоқаев журналистерге қарсы бағытталған қылмыстарды мұқият тергеуді тапсырды.