Дәурен Абаев Мәскеудегі мұражайды аралады

Көрмені аралау және мұражай директоры Александр Школьникпен әңгімелесу барысында елші Ұлы Отан соғысы туралы естеліктерді сақтаудың маңыздылығын атап өтті.

"Дәурен Абаев сол қасіретті оқиғалардың куәгерлері жылдан-жылға азайып бара жатқан қазіргі уақытта өскелең ұрпақты ортақ тарихты қастерлеу, ата-бабамыз өткен сынақтарды түсіну рухында тәрбиелеу басты міндет саналатынын айтты", - деп жазылған хабарламада.

Сондай-ақ, бірлескен жобалар мен іс-шараларды жүзеге асыруға қатысты мәселелер талқыланды.

Жеңіс мұражайы – Ұлы Отан соғысы және екінші дүниежүзілік соғыс тақырыбындағы Ресейдің басты әскери-тарихи мұражайы, әлемдегі ең ірі әскери-тарихи мұражайлардың бірі, бүкілресейлік ғылыми-зерттеу және мәдени-ағарту орталығы.

Көрменің жалпы ауданы 14 000 шаршы метрден асады. Мұражай қорына 385 000-нан астам құнды зат кіреді. Ашық алаңда Еуропадағы ең ірі әскери техникалардың жиынтығы (400-ден астам экспонат) орналасқан.

Даңқ залында Ұлы Отан соғысы жылдарындағы ерліктері үшін осы құрметті атаққа ие болған 11 800-ден астам Кеңес Одағы Батырының есімі 72 ақ мәрмәр пилонға жазылған. Олардың арасында біздің отандастарымыз: Талғат Бигелдинов, Қарсыбай Спатаев, Төлеген Тоқтаров және басқалар бар.