Қазақстандық ата-аналар Оқу-ағарту министрлігін сотқа берді

15.09.2023 15:23

10 558

Оқушылар былтырғы оқу жылы әдеттегідей 25 мамырда емес, 31 мамырда оқуды аяқтады.

ERNUR.KZ. Астана қаласының ауданаралық сотына Қазақстанның әр өңірінен 11 ата-ана Оқу-ағарту министрлігіне қатысты талап-арыз жолдады. Бұл туралы ата-аналардың мүддесін қорғайтын белгілі адвокат Жангелді Сүлейманов мәлімдеп, қазақстандық ата-аналардың неге қол жеткізгісі келетінін айтты, деп жазады tengrinews.kz.

Оқушылар былтырғы оқу жылы әдеттегідей 25 мамырда емес, 31 мамырда оқуды аяқтады. Мектеп мұндай жаңашылдыққа дайын болмағандықтан, бұл өзгеріс көптеген ата-ананың наразылығын тудырды. 1 қыркүйек қарсаңында соңғы қоңырау бұрынғы күнге қайтарылатыны жарияланды. Алайда, Сүлеймановтың айтуынша, мәселе әлі шешілмеген.

"2022 жылы экс-министр Асхат Аймағамбетов "мемлекеттік жалпыға міндетті білім беру стандарттарын бекіту туралы" бұйрыққа қол қойды. Құжат бойынша оқу жылы бұрынғыдай 34 аптадан 36 аптаға дейін ұлғайды. Біздің сұрайтынымыз өте қарапайым нәрсе - оқу жылын ұзарту туралы шешімді жою", - деп түсіндірді адвокат.

Жангелді Сүлеймановтың айтуынша, сотқа жүгінген ата-аналар білім беру саласындағы жүйелі заңбұзушылықтар туралы 50 беттен тұратын ұлттық баяндама жасап, Президент әкімшілігіне жолдаған. Олар құжатта білім сапасы төмен екені, мектептерде оқушылар көп екені, жуынатын бөлмелер болмауы сияқты 29 заңбұзушылықты көрсеткен. Дәл осындай заңбұзушылықтар Оқу-ағарту министрлігіне қатысты сот ісінде көрсетілген.