Қазақстандық олигархтар Назарбаевтың үндеуінен кейін 18 млрд теңге жинап берді

21.03.2020 18:07

820

Тұңғыш президент өз үндеуінде коронавируспен күреске ақша аудару үшін республикалық қор құруды ұсынған болатын.

ERNUR.KZ. Елбасы бастамасымен құрылған "Birgemiz" қоғамдық қорына меценаттар мен бизнесмендерден 41 миллион доллар түсті. Бұл туралы Елбасының баспасөз хатшысы Айдос Үкібай хабарлады, деп жазады Sputnik Қазақстан.

"Қайырымдылыққа Тимур Құлыбаевтан – 10 миллион доллар, Айдын Рахымбаевтан – 2 миллион доллар, Кеңес Рақышевтан – 1 миллион доллар, Ғалымжан Есеновтен – 2 миллион доллар, Рашид Сәрсеновтен – 2 миллион доллар, Александр Клебановтан – 2 миллион доллар, Александр Беловичтен – 2 миллион доллар түсті", - деп жазды Үкібай әлеуметтік желідегі парақшасында.

Оның айтуынша, қазір қорға түскен қаражат сомасы 41 миллион долларды құрайды (Ұлттық банктің бағамы бойынша 18,2 миллиард теңгеден астам).

Бұған дейін Елбасы Нұрсұлтан Назарбаев қазақстандықтарға үндеу жасаған еді. Ол ел басына түскен қиын кезеңде коронавируспен күреске ақша аудару үшін республикалық қор құруды ұсынды.